Besnik Hida mbeti i vdekur ditën e sotme, teksa u qëllua brenda lokalit ku ishte. 35-vjeçari njihej në qytetin e Lushnjes si biznesmen, pasi posedonte një pikë grumbulli makinash. Ngjarja ka ndodhur në orët e para të mëngjesit të sotëm, ndërsa nuk dihen shkaqet e ngjarjes. Sipas të dhënave paraprake, autorët kanë qenë në një makinë dhe janë larguar me shpejtësi nga vendi i ngjarjes. Viktima ka qenë në katin e dytë të një lokali, kur ka mbetur i vrarë pas një breshërie me kallashnikov.
Lushnje/Informacion paraprak
Sot rreth orës 08:15, në një lokal në lagjen “Skënder Libohova” Lushnjë, dy persona ende të paidentifikuar, kanë qëlluar me armë zjarri automatike në drejtim të shtetasit B.H, 35 vjeç, i cili ka ndërruar jetë. Autorët janë larguar nga vendngjarja me një automjet ku në ndjekje të tyre janë vënë shërbimet e Policisë Lushnjë
Policia ka ngritur pika të shumta kontrolli në hyrje-dalje të qytetit , në aksin rrugor Lushnjë Tiranë, Lushnjë Fier dhe Lushnjë Berat.
Për zbardhjen e ngjarjes menjëherë është ngritur grupi hetimor nën drejtimin e Prokurorisë Lushnjë.
Një grup specialistësh nga Departamenti i Policisë Kriminale në Policinë e Shtetit është nisur për t’i ardhur në ndihmë grupit hetimor me qëllim zbardhjen sa më shpejtë të ngjarjes.